中财网飞虎I粤语中字百度网盘:上海老里八早
来源：百度文库 编辑：中财网 时间：2024/04/29 17:53:46
饭台子浪向是讲究礼数个
叶世荪
文 / 叶世荪
上海人蛮讲究吃饭辰光个腔调个，也就是吃相要好看。饭台子浪向个吃饭腔调，可以看出伊拉屋里向个家教。有种人吃饭辰光“眼睛像霍闪(即闪电)、筷子像雨点、喉咙像电梯”，迭种急吼吼个样子，拨拉上海人笑作“吃冤家”个。
上海闲话当中个礼数，就是礼貌礼节礼仪个意思。吃饭台子浪向个礼数交关重要。改革开放之初，学外国人吃西餐礼仪时髦得勿得了，实际浪向上海人老里八早垃拉饭台子浪个礼数就老多个。只不过现在逐渐忽略咾淡忘了。比如讲：先饭后菜，上饭桌个第一口一定是吃饭，而不能抢先去搛菜。搛拉碗里个菜还呒没吃光，勿能挟别个菜；台子浪大鱼大肉咾啥主菜要由坐席浪向个长者或宾客先尝，这种礼数拉现今个公务宴请浪，表现为让领导率先下筷。还有，饭桌上伸出个筷子勿能脱他人个相互交叉，勿能单手托碗吃饭，勿能垃拉菜盆里翻拣食物。当然，更勿能拉咀嚼辰光弄出老大个声响。对于有搿点勿雅习惯个人，上海人交关看勿起。
老里八早，爷娘看到小囡吃相勿好，是要请伊吃生活个，现在侪是独生子女，饭台子浪向个规矩勿能忘记脱。 卖野人头薛理勇
文 / 薛理勇
福州路老底子也叫“四马路”，是上海“十里洋场”当中好白相个场化，凡是到上海来白相个外地人、外国人侪会到“四马路”去白相。早来拉1885年，有几个外国人租了“四马路”三开间个门面开了一家店，店里勿卖物事，就来拉厅堂当中挂了一块布帘子，当中嵌了一个人头，讲啥迭个是从外国深山里捉来个野人个骷郎头，侬朝伊望，伊也会用眼睛朝侬眨发眨发，嘴巴张发张发，引得上海人去看闹猛，只要付三分洋钿买张门票，就可以看到外国来个“野人头”。
辰光长了，交关门槛精个人就看出了门道，迭只“野人头”实际上是外国人做个一只人头模型，嘴巴、眼睛是活络个，后面用线牵牢，活脱势像一只放大个“牵线木头人”。外国人拿仔牵线木头人来骗中国人个消息就传开了，惹得交关上海人光了火，准备集合起来交外国人讲张，上伊拉个腔，几个外国人得到迭个消息后，豪燥连夜逃脱了。不过，上海滩浪向倒是留下了迭能一句闲话，叫做“卖野人头”。
来拉上海闲话当中，“卖野人头”就是虚张声势，夸大事实来欺骗别人个意思。
【沪语解释】
侪：都 骷郎头：头颅
物事：东西 讲张：讲话、谈论
迭个：这个 迭能：这么
门槛：窍门、门道。门槛精：很精明
牵线木头人：提线木偶，沪语喻被人控制、操纵的傀儡。
活脱势像：真的那样像。
沪语民瑶
小三子，
拉车子，
一拉拉到陆家嘴。
拾着一包香瓜子，
炒炒一锅子，
吃吃一肚子，
拆拆一裤子，
到黄浦江边解裤子，
拨拉红头阿三看见仔，
拖到巡捕行里罚角子。
沪语解释
拆拆：拉
拨拉：给
红头阿三：指旧上海租界中印度籍巡捕
罚角子：罚钱
上海话里向个“代句词”
钱乃荣
文 / 钱乃荣
最近，我辣龙之梦家乐福听到一位营业员辣对人抱怨：“今朝我触着霉头了！上司埋怨我勿听伊个话。伊叫我辣10点钟以前要搬好三箱子红茶上架，我明明讲了‘噢！’伊却指责我呒没反应，勿接受任务分派。”我辣边浪听了搿番话，心里想：伊个上司一定是个新上海人，不懂“噢”搿个上海话词语个意思。上海话里向辣两人对话辰光，有六个可以用一个音节表达一个句子意思个词，为普通话所无。
“噢！”ao，高降调，读音如“懊悔”个“懊”。表示“知道了”个意思，而且是“一口答应”，积极姿态。如：“甲：“侬去搬三箱红茶来！乙：噢！马上去搬。”
“嚎？”hhao，读音如“号”。相当“真的吗？”搿个句子，带有惊讶味。如：“嚎？伊到今朝还呒没结婚啊？”又可以含有恍然大悟意思：“嚎？原来伊介坏啊！”
“嚡？”hha，读音就像上海话的“鞋子”的“鞋”，勿读作“啊”a。 “嚡”表示“你说什么呀？”搿句话个意思。如：“甲：侬带张CD来噢！ 乙：嚡？”就是“乙”呒没听清爽，有“请再说一遍”言下之意。
“咸！”hhe，读音脱仔上海话里向“咸、淡”的“咸”相同，勿能读“哎”e音。是“是呀！”个意思，表示赞同或者附和。如：“甲：搿件衣裳蛮大方个嚎？ 乙：咸！我也去买一件。”
“喏！”nao，高降调。表示“给你！”、“拿去”个意思。如：“甲：我欢喜侬搿张邮票。 乙：喏！送拨侬！”
“呶！”nhao，平升调，读如上海话个“脑”音。表示“你看！”个意思，有指示拨对方看个表示。如：“呶！搿个就是侬欢喜个颜色！”
搿个六个侪是上海人辣对话当中个常用词，新上海人辣辣脱老上海人交往当中懂得搿几个“代句词”显得比较重要。上海话当中用一个词就能表达两个人对话当中一句闲话个意思，简洁明了。搿类一个音节单独成句个词，汉语语法当中通常称为“叹词”，但是普通话“叹词”当中呒没搿能样子能够代替一个短句个词，所以辣上海话当中似乎勿能叫搿个六个词为叹词。类似个还有“唔”n，读如“五”但拖音长有曲折，是“不要嘛！”婉转拒绝个意思；“咦”yhi，读如“移”，是“怎么回事？”个意思。不过搿两个词已经近于“叹词”了。
上海闲话当中类似搿种“代句词”，还有几个具有“单呼词”性质个词，可以紧接辣前面个句子后头，要停一停，再讲出来。搿搭我也举两个例子。
“噢”ao。表示“叮嘱”意思。如：“洋伞带好，噢！”“侬要跟牢伊学，噢！”言下侪有关心对方之意。假使是语气重一点、态度勿客气一点个嘱咐关照，勿带关心爱护之意，就用“嚡”。如：“衬裤换脱伊，嚡！”“明朝要来，勿要忘记脱，嚡！”“嚡”hha，读作“鞋”，勿读作“啊”a。辣辣问句里向表示“追问”、“催问”。如：“明朝侬去勿去，嚡？”“侬啥个意思，嚡？”“侬讲勿啦，嚡？”
这些词常常会用到，新上海人常常会忽略。
歡迎進入還舊樓主個人圖書館>>>