中财网亨瑞集团武汉分公司:腊八粥
来源：百度文库 编辑：中财网 时间：2024/05/02 00:44:15
辰光过得真快，西北风豁啦啦一刮，冬天介又来了。一年搿里厢呢，也到了顶顶冷个日脚【jia】———腊月（农历12月）。上海人有个传统习惯，一到腊月初八，时兴吃“腊八粥”。迭个风气，乡下头比城市里结棍。我从小嘴巴馋，欢喜吃个物【meK】事，一生一世也勿会忘【mang】记。 半个世纪前个冬天，着着叫比现在冷。一双老厚个棉鞋着【zaK】辣脚浪，还勿停个蹬脚，鞋底脱冻得绷【bang】绷硬，踏垃地皮发出“噼啪噼啪”个声响。一落雪，好几寸厚，石库门老房子屋檐下头，冻辣海个凌宕（冰锥）好几天都化勿开。搿种天气，吃一镬子热咚咚个“腊八粥”，葛【geK，那】是老扎劲个。 相传，“腊八粥”有个来历，农历十二月初八是佛教成道纪念日，用八种食材熬粥吃，习俗从佛门流传到民间。还有种讲法，有年冬天，一个穷书生进京赶考，沿途挨家挨户乞讨，拿讨来个杂七杂八米、豆类食料，亨八冷打（统统）烧来吃，结果味【mi】道交关好，就称“腊八粥”。我娪【n】奶【na】是个地道的吃素念佛人，“阿弥陀佛”一日到夜【ya】挂勒嘴浪。冰胶【gao】落雪天，烧一镬子“腊八粥”，拨全家人吃，葛是伊起劲得勿得了。 说文解字：“腊八粥”，是辣海腊月里，用八种食料拼煮而成的粥。其实，迭个“八”，是个虚数，多一点，少一点，呒没关系个。其中当以米、豆（雅称，稻菽）类为主，譬如，糯米、小米、黄豆、赤豆、花生、松子、大枣、核桃仁【nin】、山药、栗子咾啥，可以随便后拣好搭配。伲娪奶还把香菇、木耳、芋艿咾啥摆辣里向，照样蛮好吃。朦朦叫记得，小个辰光，一只行军锅模样个大铁镬子架辣灶头浪，灶膛里烧个是柴爿【bhe】。我帮着阿奶辣下面添柴，火苗映红了我个面孔。粥开了，娪奶将锅盖推开一条缝，防止潽出来。伊用大勺子辣锅里轻轻搅动，以防“得”底。伊老人家手忙嘴勿停：“阿囡，火可以小一点，但勿能熄。”“嗯，晓得勒。”我点头应诺，听着镬子里“朴朴”个气泡声，心跳好像也加快了。 等到粥熬成糊状，就可以吃了。吃腊八粥，勿兴用小碗，大人、小人，侪用青边大碗。全家八九口人，人手一碗吃辣起来。或许是天冷粥烫，或许是味【mi】道鲜香，也或许是吃口软糯，撩人食欲，全家人连嚼带喝，搿个“嚯罗嚯罗”个声音，像要掀【xie】翻整个屋顶，连隔壁邻舍【so】侪听得清清爽爽。唔奶一口气吃辣两大碗，还要用舌头舔碗边，节头【手指头】捞碗底，看上去实在寒酸相，可搿个是对“腊八粥”个一片情意啊……
陈日旭