王宝强是如何发现:堅毅加專注/ 陸羽仁-中财网

我早前在回應網友myself的提問時講到，聰明靚仔未必是人生成功要素，要有一般的成功，最關鍵是堅毅與專注，你無天才唔緊要，專注可以搭夠，我話「有德川家康的堅毅精神就夠，5呎差1吋都唔係問題，昨晚看明珠台講人才是怎樣出來的，當中講了盲眼兼自閉的鋼琴家，佢講到自己如何練就超人的琴技，主要是可以集中精神苦練，因為佢自4歲開始，就係靠彈琴和外界溝通，我估佢練咗10萬鐘頭鋼琴，有研究話你練乜嘢練咗1萬個鐘，你就可以有成就，信焉?」

Myself提問:「陸sir, 你話一萬小時專注學習, 方可見成就, 小弟好同意呀! 如果一天一小時, 一萬小時就是27年多一點, 如果一天三小時, 一萬小時亦要9年多一點, 大家都係人一個, 實踐起來係人都會覺得難, 覺得辛苦, 點解有人得、有人唔得o既呢?」

我就話好多人去到20、30歲都有啲嘢做咗1萬個鐘，例如好多男仔打機打咗1萬個鐘，之不過打機訓練出來的東西唔可以令佢搵到食，只會令佢變成不善與人溝通的宅男。男仔比女仔更沉迷打機，練好咗機械式的反應，可惜這不是搵食技能，但同時磨鈍了他們的溝通能力與人際技巧，恰恰這是搵食的主要工具，這就是越來越女仔從小學、中學、大學甚至出來做嘢都超越男仔的原因。舉呢個例子想話俾大家知，你唔係無嘢做咗1萬個鐘，問題係那些做咗1萬個鐘的事情有無用。(當然亦有人hea足1萬個鐘)

又係睇資訊節目講(好多由BBC製作)，人成功有兩種特徵，第一是邏輯思維與專注，第二是直覺判斷與創意，前者是左腦(受右手右腳活動刺激)，後者由右腦(受左手右腳活動刺激)，真正成功的人，是既有求知慾與創意，又可以專注學習提升技能。單有專注，個人較呆板，但單有創意，亦可能坐唔定學好一樣東西。
有人得，有人唔得，既有天生，亦有後天因素，天生唔講，後天因素包括有無訓練(試用不同手活動，不同腦思維)，有無環境壓力，例如以前社會窮，阿爸阿媽成日講:「讀唔到書你乞米?」就變成本來好有創意坐唔定的小孩，都有一定壓力去專注。但如今爸媽會為孩子所有需求包底，孩子缺乏壓力，亦無動力。

我又舉兩個例，一是讀書，二是學習投資。好多朋友問我平日睇乜嘢研究投資，我自30年前入大學開始，平均每日讀書、看報、睇資料的時間，我估都有3、4小時，以3小時計，都合共有32850個鐘，所以我都成為一個讀書看報搵資料的專家，讀書看報多，慢慢就會成為習慣，談不上喜不喜歡，總之習慣了每日一定做，如果話我做多一點什麼，就是多一點思考而矣，例如看見一見事發生在地球某角落，又會諗吓如果香港發生又會點。讀乜書唔緊要，總之讀書加思考，就會長知識。

再講學投資，千祈唔好以為炒咗30年股，每天炒幾個鐘，就有3萬個鐘功力，問題係你呢幾萬個鐘做咗乜。如果你係姓賴的賭仔，贏咗四圍唱，輸咗就賴人，無論你炒3萬個鐘，甚至30萬個鐘，都唔會有進步。學習投資1萬小時，關鍵除咗要俾心機研究，而唔係聽個冧巴就盲動之外，要從失敗中汲取教訓，知道失敗原因，搵出解決方法，試驗解決方法，唔得再諗新的解決方法。例如你在熱潮中炒貴股，佢回頭你唔識走輸大錢，你檢討完下次定10%止蝕。去試，發覺的確可以執行，但好易就10%止蝕，轉眼輸咗20、30%，唔掂，再諗，發覺要選擇入市位，例如等回吐不穿位才入，再試，週而復始。

總結係要堅毅加專注，用1萬個鐘的心力去做好一件，同埋要做啱件事，唔係半途而廢，或者唔用腦咁求求其其做吓。